පාර්ලිමේන්තු ප්‍රශ්න, පෙත්සම් හා යෝජනා
මහජන පෙත්සම් ඉදිරිපත් කිරීම
සභා රීති අංක 18 යටතේ බස්නාහිර පළාතේ පදිංචි ඕනෑම පුරවැසියෙකුට තමන් මුහුණ දෙන අසාධාරණයක් හෝ ගැටලුවක් සම්බන්ධයෙන් පළාත් සභා මන්ත්‍රීවරයෙකු මාර්ගයෙන් සභාව වෙත පෙත්සමක් ඉදිරිපත් කළ හැකිය.
පෙත්සම සභාවට ඉදිරිපත් කිරීමෙන් පසු වැඩිදුර විමර්ශනය සඳහා මහජන පෙත්සම් කාරක සභාව වෙත යොමු කරනු ලැබේ.
අමාත්‍යවරුන්ගේ විෂය පථයට අදාළව ප්‍රශ්න විමසීමට මන්ත්‍රීවරුන්ට බලය ඇත. සභා රැස්වීමක ප්‍රශ්න වාරය සඳහා පැය භාගයක (1/2) උපරිම කාලයක් වෙන් කෙරේ.
- එක් ප්‍රශ්නයක් වචන 150කට නොවැඩි විය යුතුය.
- එක් රැස්වීමක න්‍යාය පත්‍රයට උපරිම ප්‍රශ්න 15ක් සහ එක් මන්ත්‍රීවරයෙකුට උපරිම ප්‍රශ්න 03ක් ඇතුළත් කෙරේ.
- අධිකරණයේ විභාග වන (sub-judice) කරුණු හෝ පුද්ගලික චරිත ඝාතන ඇතුළත් නොවිය යුතුය.
වරප්‍රසාද ප්‍රශ්න
මන්ත්‍රීවරයෙකුගේ රාජකාරියට බාධා කිරීම හෝ මාධ්‍ය මගින් කථාවක් විකෘති කිරීම වරප්‍රසාද කඩවීමකි. වරප්‍රසාද යෝජනාවලට සභාවේ සියලු කාර්යයන්ට වඩා ප්‍රමුඛත්වය ලැබේ.
පෞද්ගලික පැහැදිලි කිරීම්
සභාපතිවරයාගේ පූර්ව අවසරය ඇතිව මන්ත්‍රීවරයෙකුට පෞද්ගලික පැහැදිලි කිරීමක් කළ හැකි අතර, ඒ පිළිබඳව සභාවේ විවාදයක් ඇති නොවිය යුතුය.
ශෝක ප්‍රකාශ හා නිවාඩු
මන්ත්‍රීවරුන්, ආණ්ඩුකාරවරුන් හෝ රාජ්‍ය නායකයින්ගේ අභාවය පිළිබඳ ශෝක යෝජනා ඉදිරිපත් කෙරේ. රැස්වීම්වලින් නොපැමිණ සිටීමට උපරිම දින 90ක නිවාඩු අවසර ලබාගත හැක.
පළාත් සභා ප්‍රඥප්ති සම්පාදනය
ප්‍රඥප්තියක් යනු පළාත තුළ ක්‍රියාත්මක වන ප්‍රාදේශීය නීතියයි. සභා රීති 37 යටතේ ත්‍රෛභාෂිකව කෙටුම්පත් කර සභා ලේකම්වරයා වෙත භාරදෙනු ලබන ප්‍රඥප්ති කෙටුම්පතක් නීතියක් බවට පත්වන්නේ පහත අදියර තුන සාර්ථකව පසුකිරීමෙන් අනතුරුවය:
1. පළමුවන කියවීම
ප්‍රඥප්තියේ නාමය සභා ලේකම්වරයා විසින් සභාවට කියවා ඉදිරිපත් කරනු ලැබේ. මෙම අදියරේදී විවාදයක් නොපැවැත්වෙන අතර, ප්‍රඥප්තිය මුද්‍රණය කර සියලුම මන්ත්‍රීවරුන් වෙත බෙදාහැර න්‍යාය පත්‍රයට ඇතුළත් කෙරේ.
2. දෙවනවර කියවීම හා කාරක සභා අවස්ථාව (Second Reading & Committee Stage)
ප්‍රඥප්තියේ මූලධර්ම සහ ප්‍රතිපත්ති පිළිබඳ සභාවේ පූර්ණ විවාදයක් පැවැත්වේ. විවාදයෙන් අනතුරුව, මුළු සභාවේ කාරක සභාව (Committee of the Whole House) හෝ ප්‍රඥප්ති පිළිබඳ ස්ථාවර කාරක සභාව වෙත යොමු කර සෑම වගන්තියක්ම සවිස්තරව විමර්ශනය කර සංශෝධන ඇතුළත් කරනු ලැබේ.
3. තෙවනවර කියවීම හා සම්මත වීම (Third Reading & Enactment)
සංශෝධන සහිත ප්‍රඥප්තිය සභාව විසින් අවසන් වරට විවාද කර ඡන්ද විමසීමක් මගින් සම්මත කරනු ලැබේ. සභා සම්මත වීමෙන් පසු ගරු සභාපතිතුමා විසින් සහතිකය සටහන් කර, ආණ්ඩුකාරවරයාගේ අනුමැතිය සහ ගැසට් පත්‍රයේ පළකිරීමෙන් පසු එය පළාතේ නිල නීතිය බවට පත්වේ.